Fantasy

感覺超幸福

近來~~~幸福感覺超滿溢~~~不需富有~~~幸福也會在身邊團團轉~~~

囝囝Ryan -
6月16日就一歲了,他越來越可愛,是各人的明珠,更是我的寶貝,不敢想像如失去他,我怎樣活下去

老公 -
表現良好,有求必應(可以話一般不太過份的要求),比個good佢啦

貓豬們 -
各貓豬都身體健康,食得,玩得,睡得,痾得,前排亞曳的厭食症也好了,驗了兩次血都原因不明,可能對我的疏離照顧作出控訴,最後不藥而癒,只是多買小食,罐罐,和他多些傾計~~~噢~~~對不起,以後不敢了,I'm swear,對你們不離不棄,永遠愛你們

工作 -
開始習慣,接受,應付 (煩,簡單複雜化,比人擺上枱,放飛標,鑊鑊新鮮鑊鑊金) 全部都可以處之泰然
是一個訓練EQ的好地方,有點已升華到變了沒感情的生物

我真的要大聲說, 我好幸福啊~~~~~~

UPDATE UPDATE UPDATE

高難度,邊捉腳邊咬手

轉身

老人家話3"噗"6坐, Ryan真係3個月就識轉身,不過"噗"完之後唔識轉返身,幾分鐘之後唔理佢,佢就會呱呱嘈

大發現

兩個半月時既Ryan已經成日流口水,公公婆婆話出牙仔先成日流口水喎,我話impossible啦,邊可能咁快,我仲問我fd,佢囡囡都係兩個月時勁流口水,家陣8個月先出牙仔,點知....... 100日後發現Ryan下面門牙位置"鞋鞋"地,隔日之後真係出了兩點白色牙仔,婆婆話"o牛"牙要多1個月才會再出,點知...... 再隔日牙仔已出來了,家陣有出得一半了,健康院的姑娘話要勤d清潔,否則出得快壞得快

公公話成日食手肚仔痛,比奶咀佢咬啦,不過婆婆唔多like,每次咬幾下就拎開了

牙肉痕,成日咬手仔

不知所謂

幾星期前下午,62&99黎探Ryan,咁啱我下午off,返到屋企大家傾咗幾句都係關於Ryan,過咗一陣Ryan開始扭瞓覺食奶,62就叫我抱佢入房靜d瞓,佢地繼續係廳睇電視,我就叫姐姐開奶,當我一見到個奶咀,我就問姐姐點解個奶咀爛咗(仲有d黑黑地既污穢積,個窿有紙包飲品既飲管一半咁大,試問一個3個月大既bb點啜得切,同埋咁唔衛生),姐姐話係99剪,我問用咩剪,姐姐話出面果d (平時剪垃雜野),我即刻火都黎爆句痴線順便叫姐姐換個奶咀,當我餵緊奶時,62&99就走,姐姐入黎同我講話佢地走,我就"唔"咗一聲 (原來對住佢地係唔可以用 "唔" ,後果好嚴重)

點解咁火,事原99每次見我餵奶,Ryan都食得好慢又邊食邊瞓,就話個奶咀窿細,要吉多個窿 (用火燒熱枝針辣個窿出黎 - 佢地唔知家陣係有專用吉奶咀針), 或者剪大d個窿 (佢地都唔知家陣有專用剪窿既剪),況且Ryan食奶15-20分鐘都好正常,佢地又無湊過Ryan又唔知Ryan係鍾意邊食邊瞓,我之前又同佢地解釋過,試過吉窿又試過剪大,總知家陣呢個size係最啱,又唔會邊食邊流又唔會嗆親,咁家陣問都唔問我就剪爛,即係同我作對啦,唔尊重我啦,至憎人地搞我d野,我無即時發癲,等XX夜晚返黎先嘈佢,XX叫我唔好激動,話得啦,同99講唔衛生唔好再剪lor

兩日後,XX同我講反,99 complaint反我,當日佢地走我無同佢地講聲,我同XX講反,我餵緊Ryan食奶,唔通要我抱住Ryan又揸住枝奶一卜一錄出去講聲bye,同埋佢地咁計較呢d,點解佢地唔走入黎同我講bye先呀,話晒黎我屋企wor,佢地唔駛要禮貌咩, XX話好煩,我話煩果個好似係99wor,是非精,之後我都唔理,因為我覺得無錯

昨日下午,手機voice mail有斷錄音
99: (應該係同緊62講) 佢唔敢聽電話wor,有無佢屋企電話呀
62 : (讀晒我同XX既mobile no.) 無屋企電話wor
99 : 佢緊係見到我電話唔敢聽啦,我一定要話佢,點可以比佢咁樣做,細嫂都要話,佢地唔敢聽電話啦
聽完之後我打比XX,叫佢了解下情況,又發咩花癲

XX回報
XX:又係話你果日,佢地走你唔同佢講聲,好唔開心,你係咪就咁同工人"唔"咗一聲就算
我: 係呀,想點呀,都話餵緊奶點出去講,又唔係特登唔講
XX:你見到個奶咀都面黑啦 (是實我係),所以咪"唔"就算lor
我: 咁人地話要走咪走lor,我面黑都係房啫,咁仲想我做d咩
XX:你應該同佢地講叫佢地留底食飯(我唔願意),或者坐多陣(都唔願意),唔願意都要做啦,老人家就係要呢D野啦
我: 我又唔係佢地心裡條蟲(原來唔講野係唔得架,真係死咗都唔知咩事),駛唔駛小小野發大黎講,做人到咁大年紀都鍾意搞風搞雨,你家陣即係認同佢地啱我錯啦
XX: 所以你咪唔識做人lor
我: 明明係佢地小事化大,都要認同佢地啱,咁佢駛唔駛我"針" 茶認錯,定要我打電話同佢講番,不過我會用家陣既語氣(惡,嬲)
.
.
.
.
嘈咗好耐
.
.
.
.
我: 得,以後唔會見佢地,我無錯
XX: 你覺得自己無錯,又覺得咁樣做無問題咪無問題lor

收線之後好唔忿氣,打電話比99,本來好想嘈鬼佢,但表示我唔係同佢一搬見識同野蠻,我低聲下氣咗
我: (壓住度氣)99你搵我咩事我
99: 無,我諗緊係咪做咗d野對你唔住,你要咁對我
我: 我對你點
99: (講反當日佢地走我無同佢地say bye)...你係咪睇唔起我
我: 你千其唔好咁諗,絕對唔會,點敢
99: 我當新抱係女咁教你,所以要當面同你講,你應該叫我留係度食飯,又或者坐多陣,你就咁"唔"就唔得啦,你睇唔起我lor
我: (揸頸就命)哦,咁我唔知原來唔講呢d野你會唔開心wor,咁我知下次點做啦(以後都唔見)
99: 明白就得啦
收線後覺得自己好委屈,做咩要同呢d人低聲下氣,cry cry cry

我媽:唔駛喊,唔好為呢d人喊,唔值得,野蠻人,要人地做100百分,但自己又做唔到,食飽飯無野做,等屎痾,唔見咪唔見lor,又唔係要靠佢地d乜野,唔見仲好,煩小d
我爹:都唔明佢地點解要做d野出黎拎到d後生唔開心,咁唔化,都唔識為d後生著想,成日舊事重提,搞到個家嘈嘈閉至安樂

同XX拍拖到結婚生仔差不多19年,自問對呢對老人家都好尊敬,因為知道佢地太鍾意搞事,唔敢唔尊敬,XX的大嫂(真係試過"針"茶認錯,而且仲要係小事---不可思議,咩年代),二嫂,細嫂是非多多,聽99講唔少,相信我都有比佢講,所以我都會盡量DO RIGHT THING RIGHT / NOTHING TO DO,例如:
-見面,離開都要大大聲同佢地講,一定要佢地聽到為止
-過時過節正日一定要去佢地到食飯
-生日就一定要兒女孫新抱到齊食飯+利是,大家要夾定封幾多,否則邊個封小咗比佢講十世(呢樣我覺得最低能,兒女孫新抱生日佢地從來都無表示,當然我唔會志在佢地封利是啦,但點解佢地會 expect人地要做乜乜乜,但佢地又唔會做相同既野比人地呢)
-新年我會封大利是比佢地(下年開始唔會,因為唔見)

XX我話比你知,我既世界唔止得三幾個人,我既親戚,朋友,同事一人吐一啖口水都會沉死你,仲要係個個都好錫我,反而少你果三幾個野蠻我一d都唔會覺得可惜,我活到3X歲,從來都無人令我咁討厭,咁黑我憎,咁令我厭煩,家陣有啦,係你娘親呀,你睇到又好,睇唔到又好,我都真係好憎 X nnnnnnnnnnnnnnnnnnnnnnnnnnnnnnn 你娘親呀

家陣係早上4點幾,仲未瞓得着,因為仲係覺得好委屈,勁唔開心,頭痛到"發發"聲,tmr仲要返工,點死,多得你啦---99)))))))))))))))))))))))))))

我要許願,希望99呢個名字快d係我腦海quick quick go away

聖誕禮物???

今日Ryan 剛剛3個月大, aunti Rainy, 泡泡姐姐 & 壞人哥哥黎探佢,仲帶埋手信,係馬太 (亞門娘親)既手織衫套裝, 好鬼正, 有襪仔,帽仔,背心仔, 長袖衫連帽, 不過size恐怕啱啱緊,可能會迫爆, 睇怕都要比馬太加多幾行冷線

坐櫈仔

好耐之前係mosa blog見到呢張櫈已經覺得好得意,不過睇相以為質地好硬,同埋果時未有Ryan,打消念頭,今日shopping見到sales姐姐sale緊,就走埋去八下,摸下,睇下,原來係霖霖地幾舒服,仲有好多隻顏色,適合3-14個月頸部穩陣既BB, Ryan就黎3個月,不過條頸未穩住,買定都差不多,反到屋企即刻試下,個個都話張櫈背最好高d,可以比Ryan"唉"住,又話張櫈細,夾住肶仔,但我覺得Ryan都坐得好穩陣,當然家陣只可以坐幾分鐘咋

8月31日 - 打針

今日帶Ryan打5合1 ,,去到診所磅重,,嘩 !!! 17磅, 兩個星期重2.5磅,,唔通轉咗食全奶粉重得咁快,,,,,打針時好順利,,只係叫咗一聲,,因為婆婆夾住手腳唔鍾意,,所以自己比錢($530)打針都係抵,,亞B唔駛喊得咁悽涼,,係健康院見到D BB個個打完針都喊餐屎,,唔係自己既B都肉赤,,所以決定所有針都會去診所打,,三星期後又要打肺炎鏈球菌針,,真係慘,,個個月都有針要打,,咁細個就受咁多苦,,唔打又驚,,家陣D菌咁恐怖,,打咗又驚發燒,,好彩今次打完無咩樹幹

8月18日 - 健全院檢查

Ryan 兩個月大啦,今日反健康院檢查
量體重 - 14.5磅 (100個B裡面排第10重)
度身高 - 61cm (100個B裡面排第8高)
姑娘一見到Ryan就話: 嘩,呢個B咁大隻,著緊6個月B既衫囉
仲叮囑唔好再加奶粉,唔好用米水開奶
其實Ryan都唔係食好多之麻,每日5-6餐 6oz 都無用米水開
都仲未變"米之蓮"

貓地新動向

貓地係新屋住咗一排,避免公公婆婆o依o依哦哦,暫時委屈貓地們在書房活動,待公公婆婆安心交"佰熹"給工人姐姐湊,貓地們才有機會往廳活動,不過相信都要一段時間,因為工人姐姐處事方式和衛生程度還未達標,婆婆教了她3個月家務,但到家陣仲係錯漏百出,救命)))

睇相

霸晒張書枱

見唔見到貓王

係枱底膠箱上面

妃妃鍾意係mon後面瞓

曳曳仲係咁英

Latte見親我都走去糧兜等我餵

後話

回想分娩當天,正等待佰熹沖涼時候,XX急不及待往通知由朝等到晚既公公婆婆爺爺嫲嫲

XX回來之後同我講, 報喜之後佢忍不住喊出來,急急腳搭電梯往樓下冷靜,之後佢係樓下又見到公公眼濕濕

wow.....我諗當時情景都幾touching

我初初諗住自己第一眼望佰熹都會喊,但我無...見到佢剩係覺得鬆一口,終於完成咗件大project

母親的手與小B的腳

43天大的人仔

佰熹一出世就同人有眼神接觸,係真唔係架???

但每次有人係佢身邊講野,佢既視線都會望住人

係健康院d姑娘都話佢既聲音反應好勁,即係八卦啦

呢幾日仲開始同人傾計~e e lur lur~~~

有時自己傾,有時自己笑,一家大小睇住佢都笑到見牙唔見眼

7月21日攞出世紙

小魔怪經一位大師嘔心瀝血地計算,終於有一批好名字走出黎

再經小魔怪既老豆左夾右夾,左揀右揀,又終於有名叫啦

登登登...... "佰熹" 就係小魔怪既代號

英文名...... "Ryan" 係我改既,點都要做反d野

有名有姓就緊係拿拿聲去攞反張出世紙,再搞埋其他證件啦

話晒叫做大個仔,婆婆仲幫佰熹剪咗新髮型

7月13日-滿月酒

為了方便大家,佰熹既滿月酒提前幾日擺

睇張相就知老爺家人強馬壯,仔女6個,全都結了婚

內孫外孫計埋佰熹11個,再加埋我爹媽,好多人呀

7月3日 - 睇醫生

小魔怪咁快第一次睇私家醫生,點解???因為塊面仔出現咗好多粒粒白色,又紅紅地,婆婆話係"胎毒"未清,又有老人家話係生"蘇麻"-即係蘇蝦生芝麻,要煲薏米水飲,我又驚因為我食咗薑醋,所以d人奶令小魔怪醋熱生瘡仔. 婆婆話為咗安全起見,搵醫生睇下好d

醫生話小魔怪d油脂分泌多,面皮薄,一出汗就容易積聚起來變"酒米",比咗d藥膏擦下,應該好快好反

反到屋企擦咗兩三次,但又唔覺有好轉

第二日反健康院檢查,姑娘都係話小魔怪d油脂分泌勁,只要用凍開水密密清潔就可以,千萬唔好擦藥膏,一來小魔怪未算嚴重,二來擦咗藥膏仲會令毛孔阻塞,之後小魔怪每餐食完奶,婆婆都會用濕棉花同佢小洗,早午晚都洗頭,又辛苦婆婆了

小魔怪出現人間-第十四日

今日終於有反電腦用,因為小魔怪一出院就同我一齊反新屋住,小魔怪老豆遲遲都未搬晒d傢私過黎

講反隻小魔怪,佢既出現真係令我畢生難忘

7:30 ~~~話說當天預產期一早就到醫院,check血壓,放屎屎,搞呢樣搞果樣

9:00~~~跟住就好急趕入產房,醫生穿羊水,d羊水濁,要禁食禁水,跟住姑娘吊鹽水,催生藥,初初無咩feeling,隔十幾廿分鐘只有小小經痛

13:00~~~但4 個鐘後檢查子宮口只開得1,2 度,但痛楚加劇,次數亦頻密 (對面床和我一齊催生的太太已經開了5,6度), 姑娘不停問我要唔要打止痛針,我心諗止痛針keep得4個鐘,咁快打咗之後痛餐屎點算,所以堅持唔打住

14:00~~~好痛!!!好痛!!! 姑娘再問要唔要止痛針, 我都唔諗便說 "好, 快打"

15:00~~~再檢查子宮口開得3,4度,開得好鬼慢,但痛楚,次數雙計曾加,止痛針並不是完全止痛的,只會令我有點眼瞓,但每次收縮我都會痛到出汗,小魔怪老豆就會同我抹汗,佢全程都係負責呢個工作

15:30~~~對面位太太已經生咗

16:00~~~醫生都黎埋,再check都係開得5,6度,醫生話開得咁慢,要考慮開刀,我心諗"係就快啦, 唔好要我再痛落去

20:00~~~姑娘又check,開咗7,8度啦,快啦,痛就用鼻吸氣,用口呼氣,大力吸大力呼,唔好叫呀,嘥晒d力呀

22:00~~~好.........痛!!! 痛得好密, 今次9度啦,差不多啦,姑娘不停換催生藥

22:30~~~叫咗一下好大聲,姑娘入黎睇下,問我試唔試生,我話試下啦,跟住姑娘就睇下我開得夠唔夠大,又叫我一痛就吸啖氣忍住,用力痾隻小魔怪出黎,姑娘話見到d頭髮,跟住一大班人入黎,移走下半身張床,兩腳撐開,姑娘們重複又重複叫我一痛就吸氣忍住痾,但我成日都唔明用咩力,又用錯力

23:00~~~ 姑娘話再唔得要開刀,隻小魔怪同我都有危險,叫我再加油,試咗無數次都係唔得,最後要簽紙用"真空吸引術"吸隻小魔怪出黎,醫生黎到打麻醉藥,再剪"會陰",不過無感覺,但xx話見到醫生好用力,因為我肉地厚,之後都係果個動作===一痛就吸氣忍住痾,醫生只會用兩成力,其餘都係要靠我自己

23:xx~~~吸到個頭,再用力一痾,出到晒個,要停一停吸晒隻小魔怪既痰,再用多次力,成隻小魔怪出晒黎..........呼~~~~~終於可以鬆口氣

呢個就係小魔怪啦

CHANGE

個肚愈來愈大,手腳愈來愈粗,腳眼/手腕骨/下巴漸漸地消失了
幸好還未有士多啤利鼻,身手依舊敏捷
.
不過懶咗,在家還好,隨時隨地都可以瞓著
反工就慘了,家陣一杯奶茶頂不得了
有時候雙眼集中唔到,變咗"竇雞眼",有時候感覺魂不付體
.
體溫高了,小小郁動都會成身汗,這個冬天在家都是穿短衫短褲
最多加外套,坐著的時候,肚子頂出來,剩下三份二對肥腿,不過是不會白露的
亞曳一定爬上來,我不動佢不動,可苦呢,亞曳你唔覺迫同埋熱咩
.
貓王/妃妃/Latte不如你地自己食餅餅啦,家陣我坐櫈仔屈住對腳,有d吃力喎
抹眼仔要坐大肶,無得反轉肚仔,Latte你唔好以為攬實我/埋頭係我心口扮cute
我就抹唔到你對眼,無用架,我唔會比你呃到架,古惑仔
.

好凍,好迫,好sweet

近排天氣咁凍,係屋企時候既指定動作就梗係 - 攤係梳化,"come"住條被,剩係突個頭出黎睇電視啦

係呢個moment亞爽就會跳上黎搓被被,搓到攰就會埃住我pat pat或對腳黎瞓

跟住到亞曳,佢最鍾意係我個身上面行黎行去,邊行邊搓,不過,亞曳你好重喎,想踩扁亞B咩,乖啦,就咁蹼係側邊瞓啦,同你"r"頸頸喇

Latte好奇怪,見我"come"被先會走上黎,佢最鍾意係我心口位置團團轉加搓被被之後瞓低,又要我"r"頸,不過我諗佢怕熱,因為每次都唔會停留好耐就走咗去地下做乳豬全體

妃妃見到有小小位都會攝埋上黎,轉一輪啱位就瞓低肚仔向天,要我搓佢肚仔摸心口"r"頸頸,佢就梗係好enjoy咁咪埋眼伸左手伸右搓空氣lor

貓王最多會蹼係茶几或者梳化椅背望住我,貓王仔,你嗲D得唔得,媽媽好想你嗲下喎

XX見到咁情形就會話 : 你地霸晒得啦

我就會好似D貓咁眼尾望佢一下算

我的青春

呢個並不是一個普通的花瓶

一般人會話 : 好普通啫
XX 話 : 都唔係"天鵝牌"
我D同事會話 : 下,你係公司做咗十五年喇 (其實暗地裡盤算緊我幾多歲)

呢間美國大咭公司好cheap ai, 15年前既catalog同15年後既catalog係無變過,但15年喇,都比D high value 既 souvenir啦

我揀呢份15週年紀念品算係穩陣
有D同事揀咗入咗電都唔識行既鐘
有D同事揀咗未載過都會甩色既手鍊
有個同事揀咗隻錶,點知跌落地,錶肉同錶殼即時分開,人地以為佢載A貨,瘀死

算,用黎插貓棒都幾靚,適逢爽爽生日,就送比爽爽啦
亞爽,平時貓棒止可遠觀,今日比你近望,仲可以哄下tim

貓相

呢張一定要post, 實咗太搞笑,出賣Latte都要

post咗d樣衰衰,都要post反d靚仔小小既相

動態貓王

由於大部份相片都強差人意,最好係呢幾張,粗粗地睇住先

非一般紙兜

千其唔好睇少呢個紙兜,佢既前身係"PIZZA客"既食物盛盤,但黎到我家就變咗貓豬們既寵愛

我: 妹妹,仲咩嬲爆爆咁坐住果紙兜呀?

妃妃: 我要睇到實呀,有貓成日都想侵占我張龍床呀

我: 邊個呀???

妃妃: 曳哥哥囉

妃妃: 仲有衰仔Latte呀,o胡......................

爽爽: 梗係係梳化等攝位啦,點都舒服D啦,傻仔

曳曳: 傻爽,係梳化等,幾時先等到呀,拿,睇野啦,妃妃一行開我就埋到位啦

貓王: 唉,唔夠快tim

貓王: 喂, Latte,排隊好wor

Latte: 家陣擺明打尖,點呀~~~~

公告

2008年6月中,我地呢個長毛族會多一位成員,不過今次唔係貓仔,係人仔,呢個人仔家陣係我個肚裡面嘆緊世界,已經14週,性別不詳,不過我都唔想唔知,知道都唔會講,保持神秘,至從各方發現咗呢個B既存在,大家都不約而同咁問我一個相同既問題,就係 :你D貓點? 雖然唔同人我會有唔同既答案,不過宗旨都係一樣”唔會唔要貓,一隻都不能少”

無聊post下人地影既相

話明係人地影,貓王同Latte見到人地黎,都即刻搵地方捐咗去,影都唔見,緊係無佢地d相啦

特別鳴謝 : 阿懶

誰是"安祿山"之手

邊個???邊個???係正我心口整三條抓痕,咁我仲點著low cut, deep V......

Latte : 關我咩樹,仲咩影我

好殘忍 -PG家長指引

某天早上起來,發現地上很污穢,有很多小點點,初時以為是小昆蟲,後來仔細看後,像是乾貓草,我諗緊係咪之前玩過的貓玩具留下來的呢?清潔完後無耐又來一地都是點點,想着想着點點從何來呢?已經無比野佢地玩啦?!後來發現群貓追逐着某樣東西,哦~~~原來是早前訂回來的貓草老鼠,當時給牠們玩完之後是但攝埋一邊,竟然被牠們發現,貓豬們真聰明又好記性,但我一看之下,呢隻貓草老鼠死狀恐怖,不單止爆肚,還口吐貓草,宣佈死亡時間 :某年某月某日某時某分 - 呵門 !

大阪之旅

請移"肉"步

懶

個BLOG好耐無update, 點解? 原因一個字”懶”
係公司用word寫咗好多個topic, 仲淨post相, 但遲遲都唔願拎部相機出黎,將d相過反部腦到, 點解?唔知, 明明係屋企無所事事,行出行入,攤梳化攤地下,但都係唔願接觸部相機,直頭有d逃避佢既感覺,眼尾都唔會望下佢,變態

單鏡反光的獨白:你唔鍾意我又帶我反黎? 帶咗我反黎又唔理我,你想點呀??? 我就黎發毛啦)))))))
我 (眼神閃縮): 係,係我對你唔住,你再忍耐多一陣啦,我就黎會掂下你架喇

貓砂都要上倉?

聽講呢款貓砂超好用,耐用又小粉,就叫寵物店老闆幫我入貨,1箱6包,要了2箱,加埋之前用剩2包豆腐砂,都足夠用到4個月

老闆仲送咗包糧給我試食,是新配方,有3隻味道,我揀咗呢包有omega 3,可以令皮膚同毛髮都有好處,溝落平時食開d糧裡面,屎都無咁臭wor, 呵...... 會有唔臭的屎咩?!

其實家陣食咩糧有咩所謂,天然糧也並不天然,最緊要貓貓腸胃接受到,品質不太差的,貨源穩定就可以,什麼有毒有害,食死貓狗,是否應該生產之前要驗證好,才可以生產呢,呢d都係米國對中國既政治同經濟玩對抗啫

鬼佬))))))不要用寵物過橋呀))))))

貓豬們, 對不起了,要你們吃那麼多化學品,你媽我又會煮,不過不緊要的,我也經常吃很多的化學品,有我陪,不用怕

又學人地盤點

罐罐 - 57
包包 - 69
雞柳 - 52

哦~~~點都挨到兩個月,好彩前排分咗d包包比d貓友試,去咁d貨再落order都好意思d,今次我都覺得自己有點瘋狂,不過唔order定d貨,硬係好似無乜安全感,自己無得食都無咁頭痕

書展&寵物用品展

書展日-突地請咗半日假去行,咪以為我咁好文化,其實係去買公仔書至真,你會問我:仲咩唔留反漫畫展至去? 唉,幾十歲人仲同d後生爭咩,反正我要買既漫畫書,書展都可以買齊晒,無謂迫啦,今年好醒,帶個有轆既背囊,可以拖住行,唔駛"咩"到膊頭都則晒,不過今年收穫比較小

寵物用品展 - 有免費車坐到入去,入場又免費,就入去行下啦,果度好多人帶埋狗狗去,小貓都有幾隻,場地ok啦,d清潔嬸嬸都好負責,不過美容比賽果邊就臭臭地,有好多未見過牌子既counters,d野都唔係好平,最想買手推車,有上下層果d,不過驚比xx鬧我發癲,同埋屋企無地方擺,是是但但買d走,點可以兩手空空呢,不過最特別係一款用暖水開既貓糊仔,我初初以為係麥片之類既野,可以幫助消化,原來唔係,係可以當長糧比貓貓食,我買了一小包,得閒就當小食比佢地試下

脳内イメージを表示

見人地玩得咁過隱,我都玩下先 ,首先係

"亞曳" - 佢好"愛"我,有時愛得有點瘋 "狂" ,點解咁愛我,佢都覺得係一個個"謎"

"爽爽" - 當佢"遊"玩緊既時候,每每都會被小"食"吸引,如果被騷擾,佢去好"惡"咁對峙
"貓王"- "惱"人的小伙子,性格奇特, "幸"好我做他的奴婢,但到今時今日仲係咁驚我,真有點唏 "噓"

(好邪呀 !兩日都出唔到貓王圖像,果然夠神秘)

妃妃 - ...... 要搵大師解釋一下, "H"ow come

Latte - "金"都啱佢現實既性格, "惱" & "怒"都啱佢獨家村既性格, "休"都係佢一向既作風

噩耗

athena-雅典娜係貓王&妃妃同胎既妹妹,今日收到消息,急性腎衰竭已帶走她往彩虹橋去了,真的很突然, 醫生說,3歲咁細有腎病, 好大機會係先天遺傳,所以娜娜主人都叮囑我帶貓王&妃妃做下body & blood test
唉,成日諗住貓貓平均都會有1x歲命,原來有d野係話唔埋,真係要好好珍惜同班傻豬仔一齊既日子

Latte 真身

驚未 ??? 有無嚇親 ??? 仲要唔要見 ???

鬼鬼鼠鼠

喂喂喂,你兩個係果度做咩呀?鬼鬼鼠鼠,偷食蕃薯?

哦,原來係玩緊"莎拉"送既星形閃閃棒

爽爽: 細路,咪埋黎爭呀 !!!

Latte: 哼 ! 爭野玩,你邊夠我黎

Latte : 拿...細路你醒定d,唔好亂郁,我唔.唔.唔.驚你 (震滕滕)

扭蛋機

吉豬島既迷你扭蛋機,可愛得黎又便宜,身形 5.5"w 8"d 13"h, 仲有6隻迷你"吉"蛋付送,買完扭蛋機即刻扭多6隻裡面唔知係d乜既迷你 "charmmy kitty"蛋蛋,反到屋企將平時買埋唔捨得用既貓貓電話繩塞入d"吉"蛋到,再擺晒落扭蛋機到, 嘩 !!! 好滿足 !!!

又黎包包

今次輪到Hilde出手,係萬忙之中仲要幫我地團購,辛苦晒 !
呢度8款包包,每款要咗12包,貓貓們又有口褔有排嘆.不過當我係屋企執貨期間,比我發現咗一樣好恐怖既野 .......... 就係d罐罐無乜存貨啦,好驚呀, 好在仲有包包頂住,不過我都要諗下,係時侯縮減反每日一罐既政策

意外收穫 ~~~ Hilde問我地有無試過黑缶包,有4隻味道,我一隻都未試過,不過有得試食,我當然唔會蝕抵啦,但諗諗下,呢d都係毒品黎ga,如果班老細試過鍾意,我未又要大手入貨 !?!?

改變對"二筒"的睇法

認識"狄娜"從麻雀枱上開始,n年前與雀友打雀,佢每次打"二筒"都好specify話"狄娜"呀,我問"狄娜"係咩人呀,佢一邊陰陰濕濕一邊作狀托胸笑着說:艷星呀!個胸好似"二筒",之後從一些雜誌看到她的"艷照",我以為有幾艷,o車,原來着晒泳裝,件泳裝家陣拎出黎一定比人話"娘爆",可能係當年叫做"大膽,出位"啦,所以佢主持果套---大國崛起,我都無諗住睇,咪又係d上咗年紀既亞姐出黎扮有料講兩句攞反d洗用咁啦

上星期第一集,我剛剛反到屋企做緊第二節,都無為意佢講緊乜,反屋企第一時緊係同班"大少,小姐"傾下計先啦,無意中聽到佢講: 去過咁多國家,最殘忍都係西班牙既鬥牛,d牛無選擇過去鬥,更加唔自願去鬥,鬥之前仲要比人係背部插上十幾把利劍,下下都痛到入心入肺,咁樣去鬥,就算鬥完唔死得,都難逃死路一條,呢d鬥牛既人,唔可以稱呼做"勇士" ,係"懦夫"

嘩,聽到呢度,我即刻想對住電視機,同"狄娜姐"敬個禮,我同我xx講,呢隻"二筒"講野好有point,好到,真係估唔到佢咁有高見,真係要對佢改觀

洩氣

轉咗新post一年多,工作量比以前小咗,無咁大壓力,呢個都係一個安胎好位,最衰自己唔爭氣,蛋都生唔到一粒,但新pick up既job都唔小,初初都無咩問題,做下某 dept 既 back up,不過呢到都奇怪,之前無我無back up, 同事放假d job 可以 plan到同事放完假先做,complaint no problem,不過近來亞豬亞狗放假都我做back up,唔係麻,連個temp d 拆信 print 信封都我做,我下下幾千萬上落,假假地都係assisant supervisor,多野做無問題,不過並不是"大打雜" ,點解其他人就剩係做一範,"能者多勞"即係搵笨,諗住比小小award我就打發我,正正經經加多d人工比我都順d啦
今日一路做一路"慶" ,全日黑面,有個唔識趣既同事叫我scan doc.,痴痴地,剩係做你地d野,我d野plan咗兩weeks都未清,一句"幫唔到"收線,我ex-boss話緊係唔好幫啦,大家咁高咁大,叫慣晒仲得掂

反到屋企同xx呻下,想re-sign咗先再搵工,初初佢以為我講笑,話咁好既工去邊搵呀,又唔駛ot,做野又唔多,又無壓力,人工又好,仲可以成日msn, 不過講講下唔知仲乜鬼,我d眼淚係咁流出黎,xx先開始安慰講話,真係做得唔開心就re-sign搵第過二份lor,呵...... 等你講呢句好耐啦,你肯"咩"起我就走得安樂

驗尿貓砂

平時買開貓砂的店舖引入咗呢款驗尿貓砂,貓友們之前也有講開,老闆比我$55試用價,反正試下無防,就買一包試下lor,不過買咗反屋企成個月都懶得倒出來用,今日cancan & bubble 又講開另一款驗尿貓砂,不過係日本牌子

喂)))))) over over )))))) 我買咗呢隻呀 ))))))

老闆又送咗呢包"芳香"消臭"既豆腐貓砂我試,試咗比反個result佢,呢包砂比用開果d豆腐砂輕好多,一打開,嘩 !!! 勁臭丸味,仲係以前亞媽用果隻白色波子size既臭丸味,妃妃唔蝕抵走埋黎聞,一素之下,即刻彈開掉轉頭奔走,個result係: 成包掉咗 !!!

整古

唔知點解，亞曳亞爽好鍾意追住XX對腳黎咬,每次XX係廁所或者睡房行出黎,佢地首先都懶熱情咁high身high勢,跟住左聞右聞,最後就抱住對腳黎咬,XX又唔捨得打佢,一路叫住"ci li sir lur"一路就左閃右避,或要出手按底佢地,以為佢地冷靜後鬆手走人,點知佢地原來從未放棄,繼續追捕,最後都係要我出手調停,但佢地從來都唔會咁對我wor, 唔通XX對腳好黑佢地憎???

綠色罐罐

今日食綠色罐罐,陣味都係吞拿魚味,又係好快一掃光

傻瓜機的效果

傻瓜機的效果都唔錯,自動對焦,話影就影,當然,有時d野淨小小就係淨小小,呃唔到人既~~~~~~

粉紅罐

今次團購既罐罐同錫紙包裝,聽講香港無得買,班傻豬仔有口福啦,唔駛出門都食到正宗日本野,今日就試下粉紅罐罐先,好大陣吞拿魚味,好快就食晒~~~~~~

小堆頭

今次團購雖然唔夠"煩他屎小姐爹娘"order得咁多,不過都有幾箱野,仲幾重下tim

CIAO 雞柳 X 192條

AIXIA 燒津 X 96罐

素材廚房 X 48包

真係唔該晒 angel,個order list長到暈,睇見都頭痕

又要唔該晒鴨仔同佢朋友仔幫我拎埋貨,抬上抬落

nienie, cancan, 泡泡, 木木係咪等雞柳等得好心急呢, 睇住相先啦, 呵呵呵~~~~~~

不過我都有樣頭痕...............就係要搵地方擺起D野

May 8, 2007 - 爽爽好反晒

今早一開房門,爽爽已經係門口等緊我,當我行入廚房時,佢輕鬆踏步跟住黎,倒完糧,仲埋頭苦幹咁食食食,即係好反晒啦,hohoho 安樂晒
咁,究竟爽爽你之前發生咩事呢 ????

MAY 7 , 2007 - 爽爽情況

今日比平時早起來,因為想睇下爽爽情況有無好轉,一開房門,爽爽沒有往時的熱情迎接,只在紅屋仔攤睡,摸下佢-咪一咪眼應酬便算,看起來很攰似的,Latte照舊嘈之巴閉,邊走邊叫-呢邊呀,快d啦,好肚餓呀, 給他倒糧後,看見爽爽步入來,向貓兜方向左聞右聞,吃了4,5粒糧便走開了,我繼續陪Latte吃糧,見他吃得七七八八我便往廁所梳洗,每次Latte知我係廁所,佢都會係出面大聲呼喊-仲唔出黎,係裹面仲咩啫,出黎呀,出去後,Latte又邊走邊叫邊回頭望我-呢邊呀,跟住黎啦,再倒糧,爽爽又來了,今次吃得很多,康復表現?代他吃完後,餵水給他再餵藥,之後佢又走入紅屋仔攤睡
4:00pm左右,爽爸回家睇爽,跟住報告情況,爽爽有自行飲食,摸他都有反應,不過行動依然緩慢,都好呀,起碼都有郁動
放工反到屋企,爽爽又係紅屋仔睡緊,Latte同亞曳照舊藤出藤入要開罐頭,拉開罐頭櫃,爽爽行咗入,慢步左藤右藤,分好罐頭後,爽爽係咁食,食完洗兜倒糧再食-goooooooooood,又有飲水- very gooooooooooooood,不過都係懶洋洋,當我打緊呢編野時,爽爽既然行住呼叫我,嘩 !我開心到不得了,雖然未完全復完,唔緊要慢慢黎

5月6日-爽爽睇醫生

今日爽爽唔知仲咩,無黎神氣,淨係攤係度唔郁,叫下佢,淨係郁下條尾,平時掂下叫下就會咕咕聲,家陣無晒反應,摸下佢又好似有d熱,係咪發燒呢?dr maggie星期日放假,比咗the ark個電話我,dr ho今日又係放假,不過要睇都要預早一星期book, 痴線,唯有the ark都殺,不過都要等到4:40,其間用針筒餵d水佢飲下先,用佢至愛既雞柳引下佢,佢"桔"起個頭望咗兩眼,又瞓底,擺包雞柳係佢面前,用手掂咗兩下又咪埋眼,喊到我眼都赤埋,爽爽唔我嚇我啦

4:10去到the ark,等到5:20先有得睇,已經心情唔好,仲要等咁耐,火都黎,所以dr kitty話唔好意思等咁耐,我都好悔氣話,真係等得好耐下,之後就一輪咀咁講爽爽今日既情況同提及前日洗牙驗血,但洗牙當日同昨日都無咩樹發生,一齊正常,dr kitty就聽下心跳,好急速下,可能緊張,摸下kidney,好似好rough下,探下熱,無發燒,睇下口,無咩野,咁驗下血,睇下肝腎功能有無問題,半個鐘後,有兩樣protein底咗1,2度,不過問題唔大,因為幾日無食野係會影響到個result,即係驗血結果都唔知爽爽仲咩,打咗枝皮下水針,因為驚佢唔飲水,比咗d胃藥,又比咗抗生素,要飽肚食,慘!佢咩都唔肯食,點算,反到屋企仲係咁,開罐罐開雞柳都無反應,點算,點算......

5.1貓私竇-喪玩的一天

亞門既studio除咗係佢開工地之外,家陣仲成為我地貓友既蒲點,應有盡有,要電視有電視,要睇碟有DVD,電視screen細咩,唔緊要,有投射電視,玩wii最啱feel,睇下十幾人有大有細,個個都專注係個game度,玩果個投入,睇果d仲投入,玩boxing game最睇到兩人既感情,平時一雙雙果d恩愛非常,但一玩game,七情上臉,咬牙切齒,左勾拳,右勾拳,都咪話唔凶狠,咁就睇得出佢地內心深處有股"力",玩到肚餓叫外買

仲有一樣你都咪話唔犀利,竟然連我既至愛"麻雀"都有,麻雀雖小(真係好細,要就住黎摸),但都滿足我地幾個麻雀傻人玩餐飽,止到手痕

呢次活動實咗太難忘,好開心,個個都笑到口大大,有d仲笑到碌晒地

所以要列表記底d難忘事先

亞門 - 多謝借出地方比我地玩到忘晒形,又整芒果涼粉,雖然無咩技巧,都切咗12隻芒果3舊涼粉開咗罐什果同淡奶,仲係咁洗洗d膠兜re-use

ben - 麻煩晒推住架車仔去到老遠買飲品,仲係遊戲game督導員,無得彈

亞門媽 - 完全同我地d後生無代溝,玩game又得,打牌又得,勾冷又得,湊b又得,掂掂掂

rainnie - 多謝外賣雞翼同雞肶(又話整可樂雞翼,等我滿心期望),仲有佢送既"頭獎",之後幾日仲有feel,開心屎呀)))))))))

木木,木木佬,木木b - 見過木木b幾次,每次都好乖,無扭計成日笑,係一個開心小b,好識霖人,仲有木木買既生日蛋糕,好好味

橙媽,橙爸,橙妹妹 - 第一次見面,橙媽係cancan妹妹,大家都係年輕人,一拍即合,橙妹妹好多表情,好精伶(私語:橙媽同橙爸玩起boxing上黎都拳拳到肉,睇黎佢地內心心處果股"力"都好勁)

cancan - 每次玩親都好落力,一定達到玩既瘋癲層次,笑到碌地果個咪佢lor,仲有就係麻煩晒佢幫我地同一個勁"掂"既鄺太講數買貓用品,辛苦晒

ken - 估唔到ken平時唔多出聲好鬼詩文,但玩起wii上黎又係變咗另一個人,將佢既內在潛能發揮出黎,去到忘我境界

fay, addies - 終於都見到聞名以久既lati, 真係好得意,不過玩既時候要小心翼翼,有咩損傷賠唔起,fay既勾冷越黎越掂,我已經book咗佢,第日有b,b既冷衫要佢包起晒,hohoho ...... 佢兩公婆玩起上黎又係會去到瘋癲同忘我境界,控制唔到ga

泡泡,壞人 - 近排因為miffy既離開,泡泡好唔開心,希望佢出黎玩下開心反,真係唔好意思,唔好怪我咁樣稱呼壞人,因為我一路都唔知佢叫咩名,同埋百幾張相裹面竟然無壞人既相,em ...... 好奇怪,好神秘 ......

fanny, connie, 貓 - 呢幾位稀客出現,令到個"趴地"更有氣氛

connie - 係咁抱住木木b同橙妹妹唔放,咁鍾意就自己整反個玩下啦

fanny- 淨係只住人地笑,以為佢比人點咗笑穴

貓 - 剛剛學完電單車就到,雙手曬到通紅都要玩wii,我諗之後幾日都幾難挨,因為要受雙痛之苦

我呢,就係負責用D40X影底呢d咁珍貴既片斷,總之係難忘的一天

Latte DESEX 日

牛一帶貓貓去desex,我d friend話 :你都得 !
呵 ! 無計,無時間,順便帶埋亞曳亞爽去body check下,因為近排身邊貓友既貓貓都有樹,有d仲去埋"彩虹橋" ,亞曳亞爽由細到大都多病痛,所以好驚,好驚,膽心屎 ,洗d錢,買個安心無問題

Latte 淨係desex無問題,眼簾有小小反,不過可以接受,鼻孔夠大唔駛開,犬齒有小小走位,不過都可以接受
fine

亞曳洗咗牙,無蛀牙,唔駛脫牙,好彩
做咗個簡單既blood test,尿尿test,全部正常無問題
good

亞爽都有洗牙,都無蛀牙,又唔駛脫牙
因為有前科,所以佢個blood test要做得detail d,要send d血去美國驗, 睇下d calcium 係咪好高,所以report未咁快有
尿尿test雖然無咗之前既crystal,但ph低-6,最好6.5-7啦,要飲多d水,最好淨係食xd濕糧,其他唔食得,否則石仔好快反黎
x-ray 膀胱仲有6個月前果兩粒石仔係度,都係果句,考慮做手術拎反出黎,因為都有機會移到去尿道,但家陣好地地,真係唔想無啦啦又同佢開一刀喎

爽爽,不如你話比媽媽聽,應該點做好

D40X 下的貓貓

亞曳,終於唔黑面,影到靚仔樣

亞爽 ,英俊依然

貓王,仲貓王

妃妃,靚到 "dum dum"聲

Latte, 好精伶

不過影相之前一家要同貓貓大執一番,抹眼梳毛唔小得,因為影得太細緻

好華麗呀

我對豹紋,虎紋既用品一向都唔係好喜歡,所以誠意請求"黃太"(即係我亞媽)縫製反個華麗既貓床鋪,取代之前既豹紋床鋪,意料之外係,竟然仲有多一個咁華麗既cushion,兩者相襯之下,oh......實在太華麗啦

只可惜呢set咁華麗既組合,剩係得高貴既妃妃至識欣賞

出街破財

行經貓精品店,點可以空手走反出黎呢
呢款石頭貓mouse pad 我無wor, 緊係買啦
呢款Manhattaners貓抹mon電話繩,好有用wor, 要買
呢條Wachifield噹噹黑貓電話繩,啱啦,公司條掛頸繩斷咗,買
呢款Cat Tarot好華麗,又有英文說法書講解(緊係唔睇啦),好有珍藏價值,買
呢條Manhattaners貓眼鏡布,屋企無wor, 緊係又要買啦
hohohohohohohoho,滿載而歸

龍床都不及貓竇

你兩個衰仔,早知你地鍾意瞓紙皮箱,我就唔買張床啦,好彩仲有張未拆,留反黎送比人,我第日要係街邊同d亞婆爭紙皮,大家千其唔好怪我, 我都係為咗班仔女咋

驗屎員

近排好緊張佢地既屎屎,每次有貓貓便完都即刻走去睇下邊隻痾完,跟手剷埋,但剷之前都要反東反西,睇下d色澤,軟硬情度,臭味如何咁,呢個動作令我諗起"未代皇帝溥儀",有一幕係講,小溥儀痾完屎屎,成班太監都好緊張,左藤右藤,有個太監就攞起兜屎屎,左聞右聞,左睇右睇,之後就講一大堆野,類似小溥儀既身體狀況係點,淨d乜淨d物,要食反d乜食反d物咁,估唔到,家陣我竟然輪落到做埋太監果份

爽爽又要睇醫生

爽爽係成屋最嗲既貓貓,成日用個頭頂黎頂去,又"high"身"high"勢,又嗲叫,叫佢兩聲"爽爽"就會電動走埋黎"咕咕咕",任摸任抱唔怕陌生人
三年前發現佢尿頻又有血,初初驗到都係尿尿有某種好稀有既"crystal",點解話係稀有呢,因為佢既血,calcium比較高,而另腎臟制造呢種"crystal"出黎,去到膀胱,久而久之就會變做石仔,係遺傳性
第一個醫生又話要開刀攞d組織去外國化驗,第一次預到呢d case,驚到眼淚嘣嘣聲流出黎,打咗枝針就反屋企,但仲衰,爽爽直頭控制唔到d尿尿係咁流出黎,第二日喊住打比dr ho,好彩有位,因為聽人講超難book,拿拿聲湊去睇,原來都唔係咁嚴重,食護膀胱同舒緩神經藥就無樹,大半年後來又來尿頻有血,今次超級嚴重,x-ray片下膀胱滿佈星星(石仔),即刻要做手術,之後要食住xd糧
上兩個月撞鬼,成屋貓痾爛,絕糧兩日後,Latte同妃妃都好反,亞曳亞爽貓王都繼續痾爛同有血仲有啫喱一泡,懷疑都係"梨形蟲",又係要搵dr ho傾下計既時間,貓王食咗一日藥已經好反晒,兩日後,亞曳都好埋,亞爽呢,屎屎靚反但仲有血,又要睇,嘩,磅一磅,一星期輕咗一磅,因為佢真係無咩食過野,dr ho話drontal plus係有小小影響胃口,不過都成week,藥氣應該過晒,同埋d藥(抗生素,消炎藥,消化系統藥,杜蟲藥)都會殺咗好多腸臟病毒同菌,一係驗下血睇下腎,肝功能有無問題,一係再食多一week抗生素睇下點,不過最緊要佢食反野,因此lost weight都係一個問題,就咁比咗一week抗生素,一樽保養品同wd糧,10日後都重有問題就要覆診驗血

10個月大的Latte

Sara奶媽,家陣我認喇,Latte真係好多毛呀

正經起上黎都幾靚仔,難得

吼...

每次見我行入廚房,佢都跑得快過,坐係佢個貓兜前面,等我倒糧,唔理佢呢,佢就會行來行去,望下你咁,扮可愛,扮可憐,再唔理呢,就大聲"喵..."

大師級下的貓王

呢位大師最鍾意影貓貓伸脷

罐罐

話說,近排貓奴界興起瘋狂團購日本貓罐頭食品,見人地買得咁興奮,我又身痕咁想去試下,但因為個人怕魚腥既原因,貓貓們一路只係食ciao既雜菜雞,所以都唔知買邊隻品牌好,菲菲可能見我d貓咁悽涼,獨孤一味,就比咗幾款貓罐頭我d貓貓試食喇,臭豬們,快d多謝菲菲姨姨啦

曳曳: 多謝菲菲姨姨 (細細聲 : 終於都有第二d野食喇,唔駛咁"枯燥")
爽爽: 多謝菲菲姨姨 (細細聲 : 係囉,真係"乏味")
貓王:多謝菲菲姨姨 (細細聲 : 直頭無d新意啦)
我 : 咪以為我聽唔到呀,咁悽涼又次次都食得咁快
妃妃: (細細聲 :好過無囉)
latte : (點頭)

罐罐報告 - 素材廚房

首先黎個"素材廚房"先,都幾香,唔係好腥味,有d啫哩汁,有d魚仔,有d肉,有d蟹柳,5貓瘋狂喵叫食,好快就清晒碟加照鏡,兜都拉到出晒界

即係 : 好味到痺呀

champion

唔去cat show都無所謂啦,反正我d寶貝貓係我心目中,全部都係CHAMPION

陰謀???

某日回家途中,老公突然同我講

老公: 哼,我發現你一早有預謀養五隻貓
我: 吓??? 咩呀 ???
老公: 你唔駛唔認,古古惑惑,反屋企睇下個寢頭啦
我: 吓???痴線既,都唔知你講咩

反到屋企就入房睇下個寢頭,原來...... 哦.....
你地又睇唔睇到 ......

老公一路續隻篤一路續隻講 :
喇!兩隻灰色咪亞曳亞爽lor, 兩隻啡色咪貓王妃妃lor, 仲有中間果隻咪latte lor, 哼......
我一路剩係識得笑住話: 係wor, 你唔講真係唔知wor,又會咁啱嘅,
e,咁張被咁多貓,咁咪又係暗示我會有好多quota lor, hohohoho

菠蘿屋

某日放工見到街邊擺賣寵物屋同寵物衫
我既身軀不由自主地被吸引過
有菠蘿屋,士多啤利屋,仲有大中細size
大size都係$110,咁鬼平,唔買都對唔住自己啦
反到屋企諗住影張相先,跟住拎去洗
因為都好大陣聞,同埋驚洗完會變形
點知妃妃一個箭步就走咗入屋
睇黎佢好鍾意

月曆

由生果日報出版既月曆
又得攝影師(亞門)既賞識
貓王仔好榮幸做到6月份主角

不過...不過...... 點解...
咁多靚相唔揀,係要揀呢張

亞編輯哥哥/姐姐,你真玩野

同事送的泰國手信

呵呵呵,開心死
對於我呢d無得去旅行既人黎講
收到手信,仲要係貓用品
真"梳乾"
其實係我強烈要求呢位同事買的
初初說笑要五隻,諗住佢都唔會啋我,點知真係有幫我買到,兩隻都好

多謝晒 Kathy!!!

新屎坑

新屎坑個盒好大,因為係jumbo size
隔離果個用緊已經係大號廁所
呢個有自動剷砂工能既貓廁所
外貌相當吸引,好似會展新翼咁,
即係好似飛龜,幾型
但...原來唔係每隻砂都用得
最好就係用everclean, tidy cat 果 d
不過我唔想用果d喎,沖唔到落廁所
死心不惜咁試咗細條同圓粒豆腐砂,但失敗咗, "click"鬼住晒,跟住再試小麥砂,都剷到,但小麥砂唔係好結,散晒
死火,覺得"賴咗野"tim

由貓王仔示範聞下新屎坑

貓藝術

爽爽最鍾意去到邊抓到邊,但從來都唔抓貓樹或抓板,呢張布梳化就係佢既至愛,呢套已經係第二套梳化布,好可惜再無第三套,因為呢張梳化已經過時轉咗款,想配都配唔反,唯一辦法係買過張新梳化 ...... 衰仔

係呀,又係佢 - 貓王仔

Joyce & Marcos

雖然呢個blog一向都淨係post我d仔女既日誌,但2006年10月15日呢個日子一定記錄起來,呢日係我一位好姊妹既結婚大日子,我地由form 1 相識,我地當時就好似孖公仔咁經常出相入對,form 4 佢轉到另外一間中學,感情疏離咗一陣子,幸好大家form 5畢業後繼續緊密聯絡直到家陣,結婚當日,感覺好似真係自己嫁妹咁好開心佢地真係"郎才女貌,天生一對" 我要祝福佢地

Joyce & Marcos

***白頭到老永結同心**